Díli, 5 Juñu 2025 – Komisaun Nasional Desportu (KND), halo kooperasaun ho Federasaun Futeból Timor-Leste (FFTL), hodi hala’o sesaun Anti-Doping Education and Learning (ADEL) ba ekipa nasional futeból feto U-19 iha Xanana Sport Center, Dili. Formasaun ida-ne’e hala’o durante Loron ida-ne’e ninia objetivu mak atu hametin atleta sira-nia koñesimentu kona-ba regra anti-doping, sira-nia direitu no responsabilidade, no importánsia husi kompetisaun ne’ebé moos no justu.
Sesaun ne’e hala’o ho tema, “Hakbiit Timor-Leste nia atleta atu lidera ho Integridade, Justisa no Exelensia.” Inisiativa ida-ne’e fó apoiu ba atleta sira atu kontinua sira-nia aprendizajen liuhusi ADEL, ho objetivu finál atu hetan Sertifikadu Atleta Nivel-Internasional, hodi asegura katak sira prepara didi’ak no prienxe rekizitu sira hanesan reprezentante Timor-Leste nian.
Programa ida-ne’e reflete kompromisu nasionál ne’ebé boot ba desportu moos, liu-liu tanba ekipa prepara ba ASEAN U-19 Girls’ Championship 2025 iha Vietnam husi 9 to’o 19 Junu. Liu husi kolaborasaun kontinu ho Federasaun Nasional sira hanesan FFTL, KND iha kompromisu atu forma atleta jerasaun foun ida-ne’ebé kompete ho orgullu, integridade no respeitu iha nivel global.